لسه

لسه لما تنضغطي بتهربي

لسه لما تحاوطك الحاجات الكتير بتسيبيها وتقعدي في البيت .. 

لسه مش قادرة ع المواجهة .. 

البنت اللي كلمتك عشان موضوع، وبتخافي تنزلي من القِسم لاتقابليها صدفة ومش قادرة تقوليلها: لأ 

المشروع اللي ماشتغلتيش فيه، فتقرري ماتنزليش من البيت وماتقابليش التيم اللي بتشتغلي معاه لأنك مش قادرة تواجهيهم بتقصيرك

الأسرة اللي بتشتغلي فيها، ومابترديش على رسايل عتابهم لأنك ما ردتيش على اللي قبلهم 

مع إنه التأخير في الرد ع البنت بيزود الإحراج، ومع إنه عدم مقابلتك للتيم بتزود التقصير، ومه إنه تراكم الرسايل بيكبر العتاب

لكن لسه بتهربي

ولسه الهروب مش حل  ..

..